गाउँमै आएर सेवा दिने अस्पताल

गोपाल रेग्मी
चौरजहारी
जिल्लाको चौरजहारीमा रहेको चौरजहारी अस्पतालले समय समयमा गाउँगाउँमा पुगेर समेत स्वास्थ्य सेवा प्रदान गरिरहेको छ । अस्पतालले जिल्लाका बिभिन्न ठाउँमा शिबिर सञ्चालन गरि यसरी सेवा प्रदान गरिरहेको हो । यसै सन्दर्भमा साता अघि  जिल्लाको विजयश्वरीमा एक दिने निशुल्क स्वास्थ्य शिविर सम्पन्न गरेको छ । मानव विकास तथा सामुदायिक सेवा चौरजहारी अस्पताल रुकुमको आयोजनामा शिविर सम्पन्न भएको हो । 

गाविसको वडा नम्बर ९ मा रहेको मालिका प्राथामिक विद्यालय अम्लाटाकुराको प्राङगनमा शिबिर संचालन गरि २ सय ७ महिला र १ सय ५० पुरुष गरी जम्मा ३ सय ५७ जनाको स्वास्थ्य परिक्षण, उपचार तथा परामर्श सेवा प्रदान गरेको बताईएको छ । गाबिसको अति दुर्गम वडाको रुपमा चिनिने अम्लाटाकुरामा पहिलो पटक शिविरको आयोजना गरिएपछि स्थानीयहरु खुसि समेत भएका थिए । 

शिविरमा सहभागी भएका अधिकांस विरामीहरुमा नाक, कान, घाँटी, रुघाखोकी, दम र ग्यास्टीक लगायतका समस्याहरु बढी देखिएको शिबिरमा पुगेका डा.अभिजित मिश्रले जानकारी दिए ।  त्यसैगरी शिविरको अवसरमा स्वास्थ्य सरसफाई, पोषण र अपांगता सम्वन्धी सचेतना समेत प्रदान गरिएको थियो । अस्पतालका प्रशासक डिल वहादुर गिरीको नेतृत्वमा २५ जना स्वास्थ्यकर्मीको टोली शिविरमा खटेको बताईएको छ ।